SHON LOU: DI BÈRDÈBÈRDÈ UN GRAN DAMA

Lucina Elena da Costa Gomez née Matheeuws, Shon Lou manera mi tabata yam’é, lo keda elogiá e dianan aki pa prinsipalmente su lucha pa emansipashon di hende muhé i e echo ku e tabata e promé hende muhé minister-Presidènt den Reino Ulandes. Ami lo hasi esaki di un otro manera, unu un poko mas personal.

Mi a siña konosé Shon Lou na 2006, algun siman promé ku e promé elekshon na kua mi a partisipá. Mi a keda invitá pa su kompañero di bida, Sr. Juancho Evertsz (dfm), ku kier a sera konosí ku mi i pa bisami ku pa di promé biaha for di dia ku e a retirá for di polítika e lo bai vota i lo vota pa mi. Di e promé enkuentro ei, mi amistat ku Shon Lou a krese i nos a gana otro su konfiansa. Komo Presidente Honorario di Fundashon mr. dr. Moises Frumencio da Costa Gomez, Shon Lou a rekomendá pa mi bira Presidente di e Fundashon. Lokual e a pidi mi despues komo Presidente ta pa e papia personalmente ku kada posibel miembro nobo pa e direktiva di e Fundashon. I ta esaki mi a siña i apresiá di e persona Shon Lou; e importansha ku semper e a duna na e kontakto personal. Ora e no por a haña mi na telefòn e no tabata laga mensahe digital atras, pero mi tabata risibí su notanan skibí na man ku un ‘heading’ konteniendo su nòmber, adrès i number di telefòn. Mi tin tur wardá. Semper e a duna hopi atenshon pa papia i komuniká ku hende. Ta p’esei no por ta un sorpresa ku su úniko remetido ku e a yega di skibi manera e a bisa mi, ta ora dos korant na Papiamentu di atardi a akus’é di ta menospresiá e pueblo dor di eksihí ku hende mester a traha un sita via di telefòn i no por kana drenta asina asina den su ofisina eksihiendo un kombersashon. Aparentemente e korantnan tabata haña ku ta un eskándalo ku pueblo mester traha un sita promé ku papia ku un polítiko. Den su remetido den e korant Amigoe di Curaçao di 29 novèmber 1974 titulá Miho Rabia ku Duele e a pone bon kla ku “Lucina no ta tende hende, hari cu nan, haci bunita, sin haci nada pa nan.” Den e remetido aki e a dal e dirigentenan di Partido Demokrat duru akusando nan di a bai skondi den eksterior i no dediká atenshon at all pa pueblo. Na vários okashon Shon Lou a menshoná mi e historia aki ku opviamente a sigui molesti’é pa hopi tempu. Un di e historia ku mas mi a gosa sinembargo ta tokante di un grupo di hende ku a bin bishit’é na su ofisina un mèrdia pa papia di un problema personal. Tabata den temporada di kampaña elektoral. Dos òf ta tres hende a drenta su ofisina ku awa na wowo. E problema nan a splika tabata un miembro di famia ku a muri i ku nan no tabatin sufisiente plaka pa der’é. Despues di a skucha hinter e splikashon di nan pèrtá, Shon Lou a bai di akuerdo pa duna un kantidat di plaka pa e hendenan aki por a kumpli ku nan defuntu. Su siguiente dia Shon Lou a pidi dos hende di konfiansa pa kumpra un krans i hiba esaki pa e famia en kuestion. Awèl, Shon Lou ta konta, e hendenan aki a kore, kore den bario pa mas ku un ora ta puntra unda nan por haña famia tal ku a pèrdè su ser kerí. Despues ku un bon alma a logra identifiká unda e famia ku nan tabata buska ta biba, e dos hendenan a yega na e kas en kuestion. Solamente ku na e kas no tabatin esfera di entiero, sino un fiesta animá ku amplifaier. Disgustá e dos hendenan a bai bèk e siguiente dia serka Shon Lou i a konta kiko a pasa konsehando pa desenmaskará e hendenan aki i pone nan paga e plaka bèk. Shon Lou, ku un enorme sonrisa riba su kara a sigi kontami ku e a bisa nan ku un trankilidat ku solamente bo por tin basá riba eksperiensha di bida i politika: “Sea ku nan a usa e plaka pa entiero o pa fiesta, bosnan no ta kere ku nan lo vota pa nos partido? Si nos bai konfrontá nan, nos lo pèrdè plaka i pèrdè e voto. Pues laga nos hasi manera nos no sa kiko a pasa”.

Shon Lou tabata un konsehero, pero mas ku tur kos e tabata un amiga. Sosega na pas Shon Lou.

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

3 thoughts on “SHON LOU: DI BÈRDÈBÈRDÈ UN GRAN DAMA”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s