Viktoria di Maduro, futuro skur pa Venezuela

Elekshon presidensial ayera ku oposishon Venezolano i komunidat internashonal a kalifiká komo ilegítimo, a produsí komo ganadó indiskutibel, Nicolás Maduro. Esaki kier men ku Chavismo, ku a start for di aña 1999, probablemente lo keda prolongá ku seis (6) aña mas serka nos bisiñanan na Sur.

Lokual ta prekupante ta ku e kampaña ku Maduro a hiba a demostrá ku no tin plan òf pèrspèktiva pa drecha e situashon horibel ku Venezuela ta aden. E produkto interno brutu Venezolano a bai atras ku 50%, inflashon ta 13,000%, entre 2-3 miyón hende a bandoná e pais, tin skarsedat di kuminda i remedi, i e ader ekonómiko mas importante, esta sektor petrolero, ta den chokompé ku un produkshon mínimo. I no papia mes di kriminalidat. Demokrasia i estado di derechi no tei práktimente i lidernan prinsipal di oposishon ta prisonero polítiko. Den un palabra, Venezuela ta un estado frakasá. Apesar ku maneho di e pais ta den man di Chavismo pa dos dékada, Maduro ta tira tur falta riba otronan, asta Kòrsou, Aruba i Boneiru.

Viktoria di Maduro ta habri kaminda pa mas Venezolano buska refugio pafó di nan pais kreando ainda mas doló di kabes pa bisiñanan, inkluso nos islanan. E viktoria lo intensifiká esfuersonan internashonal pa imponé sanshonnan mas pisá ainda. Mirando e estado di kiebro práktikamente di e sektor petrolero Venezolano ta pone na duda ku -apesar di e sentensia ku a kai den Korte siman pasá na Willemstad- PDVSA SA por kumpli pa manda sufisiente petroli pa Refeneria Isla BV drei efisientemente aki na Kòrsou.

Speransa pa trese un kambio bèrdadero na Venezuela dor di akshonnan internashonal manera sanshon ta improbabel pasombra paisnan manera Nicaragua, Cuba, Rusia i China lo no lag’é kai fásil. Konsekuensia lo ta sinembargo ku mas i mas e grep ekonómiko Chino riba Venezuela lo krese. Rusia, yudá pa e maneho di America First, ta haña kaminda pa kana sin masha resistensia i lo oumentá su dominio geopolítiko na Venezuela. Kurioso ta ku Maduro su plataforma ta “soberania” mientras ku tin tur indikashon ku e ta hustamente entregando soberania Venezolano kada biaha mas na China i Rusia.

Un di dos opshon pa kambio ta via e ruta no-demokrátiko (golpi di estado) ku tampoko lo kumbiní. I sigur no si esaki ta orkestrá pa paisnan estranhero.

Por lo pronto ta parse ku e futuro di Venezuela ta skur i ku e krísis lo intensifiká i sufrimentu humano lo oumentá promé ku yega na un solushon.

Willemstad, Curaçao

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

2 thoughts on “Viktoria di Maduro, futuro skur pa Venezuela”

  1. Alex dikon ora bo tbt den gobiernu bo no a bira minister di ekonomia. Ora mi lesa bo artikulonan mi ta ripara bo sa hopi di e problemanan di Korsouny Antillas. Lo mi gusta si lo bo por manda un stuk pa gobiernu kon segun abo nos mester kombati e konyuntura ekonomiko ku nos ta konfrontando for di 2010.

    Ku hopi respekt di mi parti

    Liked by 1 person

    1. Si bo ta kòrda Viktor, tabatin un akuerdo polítiko despues di elekshon na 2012 pa bin ku un ’Takenkabinet’. E palabrashon tabata ku ningun hende riba lista lo a bai den gobièrnu. Despues di algun luna a kita e eksigensia di un Takenkabinet. Nos a mira tambe ku tur lider polítiko a opta pa bai Staten i no gobièrnu. Por sierto di 2005-2006mi tabata mi isterdi Ekonomia di Antia Hulandes.

      Liked by 1 person

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s