Café Santa Rosa, e bar mas bieu di Kòrsou ta kumpli 75 aña

Establesé riba 8 yüni 1943, Café Santa Rosa ta e bar eksistente di mas bieu na Kòrsou. E bar ta keda den Santa Rosa i ta mihó konosí pa hopi hende di bario komo Martins Oranjeboom. Esaki pasombra e promé doño, Martins Mademilia tabata importá serbes di marka Oranjeboom ku e tempu ei tabata popular.

Un pabien pa José ‘Shon Ma’ Mademilia (yu di Martins) i su famia ku e aniversario aki.

E bar a keda konstruí durante di e periodo mas intenso di e di Dos Guera mundial ku e meta pa ofresé algu di entretementu den un periodo skur ku no tabatin tin posibilidat pa rekreá kasi. Rápidamente e lugá a bira un sentro di enkuentro pa hendenan di Santa Rosa i alrededor. Tambe e tabata un lugá pa sosiegu di hendenan trafikando na pia, riba kabai òf buriku i tambe shofùrnan di bus.

Mi a lanta no muchu leu for di Café Santa Rosa. Mi tabata pasa su dilanti tur dia ora pa bai skol i kas despues. Drenta e bar si tabata algu estriktamente probibi pa mucha. Asta mi a lanta tende ku un hende muhé respetá no ta bishita tal lugá. Tempu a kambia sinembargo. Tòg nunka mi por a kombensé mi mama pa bishitá e bar dia mi tabata manehá esaki na aña 2012.

Tempu e bar a kumpli 65 aña na 2008, mi a kombensé e doño pa lagami start e proseso pa haña rekonosementu pa e bar komo monumentu. Ounke ku e proseso aki no tabata fasil, na 2011 ofisialmente Café Santa Rosa a keda designá un monumentu históriko kultural. Mi miedu ku e bar lo por a keda kombertí den un lugá di hasi kabei i uña òf algu ku no ta kuadra ku intenshon di su doño a keda kalmá. Por lo ménos asina mi a kere.

For di aña 2013 e bar a keda manehá pa hendenan ku no tabata tin interes òf sentimentu pa e tradishon i kustumbernan sosial importante di e bar. No por ta un sorpresa ku barnan tradishonal manera Montaña Bar, Welgelegen Bar, Semikòk Bar i Langulé Bar no ta eksistí mas netamente pasombra nos no a interesá pa konservá nan tradishon. Klientenan ku hinter nan bida a bin Café Santa Rosa no a sinti nan mes na kas den un ambiente ageno Ulandes Oropeo. Nan a sinti nan mes menospresiá i kasi tur a bai i no a regresá. Ayó e ambiente di sùlt, tentalaria (probablemente esnan di mas sabroso na Kòrsou) i e fiestanan di djadumingu ku e tradishonal müsik di ka’i òrgel. Mas horendo ta e echo ku mobilario original i parti di e interior di e monumento a keda dañá i asta kibrá di tal manera ku esnan ku semper a bai Martins Oranjeboom lo no por kere nan wowonan

Sinembargo tin un lus na horizonte. Ya esnan ku tabata manehá e bar no tei mas. Banda di e destrukshon asta ta asina ku nan no a kumpli na tempu ku pago di hür. Despues di un periodo largu di drechamentu i renobashon, Café Santa Rosa pronto lo habri su portanan manera mi a komprondé. Mas kontentu ainda mi ta ora mi a tuma nota ku tin algun kandidato ku sentimentu pa e balor históriko kultural di e bar ku ta dispuesto pa kuminsá un kapítulo nobo den e tradishon largu i glorioso di e bar di Santa Rosa. Meskos ku ami tin hopi hende ansioso pa dal un yoshi ròm bèrdè i ches riba poko sùlt.

Tbilisi, Republic of Georgia

*Translation in English of this article can be found under: “Café Santa Rosa, the oldest existing bar turns 75”

 

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s