1941: E aña ku solamente un partido a bai elekshon dor di bòikòt religioso

 

59A2909B-0DF0-4C06-8478-B5A2DC0923B2

Bo ta na altura ku tabatin un elekshon na Kòrsou na kua solamente un (1) partido polítiko a partisipá? Esaki a sosodé riba 17 novèmber 1941, e promé i úniko biaha den nos historia. E motibu no tabata union di pensamentu pasombra nos tabata den e di Dos Guera Mundial, pero hustamentu pa un sentido di division nunka ántes bisto riba nos isla.

Na e promé elekshon pa Staten (20 desèmber 1937) a partisipá tres (3) partido polítiko. Por a vota solamente hòmber di 25 aña pariba, ku a paga belasting, gana por lo ménos Naf 100,- pa luna i tin un sierto nivel di enseñansa. Staten tabata konsistí di 15 asiento di kua 10 (6 pa Kòrsou) skohé i 5 nombrá pa Gobernadó. Repartishon den Staten tabata 8 katóliko i 7 no-katóliko lokual a trese  diskushonnan eterno i hopi bataya. 

Miembro di Staten pa Partido Katóliko, Dòktor da Costa Gomez, a introdusí un lei nobo i a baha e rekesitonan pa vota. Ku esaki mas hende di e pueblo katóliko por a vota. Si na 1937 na Kòrsou 2.,030  por a vota, esaki a bira 2,453 na 1941.

E no-katólikonan tabata furioso ku e kambio. Un kantidat di 56 suidadano den un karta a urgi Gobernadó pa para elekshon di 1941 argumentando ku: siendo den di Dos Guera Mundial mester evitá un elekshon ku por asentuá e diferensianan entre gruponan;  i  ku no por tin elekshon mientras un sensura di prensa (yüni 1940 pa sèptèmber 1942) tabata vigente. Gobernadó Wouters a rechasá e petishon sinembargo.

Pa pone preshon i salbaguardiá poder di e no-katólikonan, a lanta Vereniging tot behartiging van de staatkundige, economische en culturele belangen van het gebiedsdeel Curaçao. Intentonan pa forma un partido no-katóliko no a prosperá sinembargo. E asosashon seguidamente ta pidi pa tur partido no-katóliko bòikotiá e elekshon di 1941 tambe pa ningun no-katóliko pone su mes riba un lista polítiko. Na kabes di e organisashon, e dòkter médiko W. Maal ku komo redaktor di e publikashon “Curaçao” tabata fulminá kontra katólikonan i tambe e korant pro-katóliko, Amigoe.

Partido Katóliko tabata pues e úniko partido ku a partisipá na e elekshon na 1941. E seis miembronan di Staten skohé pa Kòrsou, tur katóliko, tabata Sres. Sprockel, da Costa Gomez, Römer, Désertine, Ellis i Kroon. Di e miembronan skohé pa Boneiru, Aruba i Islanan Ariba, solamente 1 tabata katóliko. Mas aleu Gobernadó a nombra 5 miembro di Staten di kua 2 tabata katóliko.

Final di kuenta Staten tabata konsistí di 9 katóliko i solamente 6 no-katóliko. E bataya polítiko feros di hopi aña basá riba religion, a keda definitivamente ganá pa katólikonan. Polítika for di e momentu ei praktikamente no a keda hibá mas a base di e mesun fervor religioso di ántes. Desunion no a desaparesé sinembargo, pero a kontinuá a base di otro divishonnan real òf kreá.

Willemstad, Curaçao

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

3 thoughts on “1941: E aña ku solamente un partido a bai elekshon dor di bòikòt religioso”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s