Riba 17 mart 1949 ta 70 aña di e promé elekshon general (hende muhé i tur hende hòmber por a vota). Esaki ta e promé artíkulo pa konmemorá e echo.
Vikario apostóliko di Kòrsou, mgr. Van der Veen Zeppenfeldt algun dia promé ku elekshon pa Staten riba 17 mart 1949 ta saka un Karta di Kuaresma atvertiendo katólikonan pa no vota riba Partido Demokrat (DP) pasombra e partido ta “kontra di e prinsípionan katóliko”, esta “christelijke orde en een betere beleving van het christendom”. Segun e iglesia, DP siendo no katóliko, tabata inkapas pa goberná kristianamente. No ta un sorpresa ku DP a protestá fuertemente kontra di elekshon riba djaluna pasombra katólikonan tabata usamisa riba djadumingu pa propagá i influensiá voto (https://alexdavidrosaria.blog/2019/01/15/pakiko-ta-vota-riba-djabierne/).
Den e mesun karta mgr. Van der Veen Zeppenfeldt ta pidi pa no vota pa Nationale Volkspartij (PNP) i ta menshoná mr. dr. Moises da Costa Gomez (Dòktor) na nòmber apesar ku PNP tabatin un ideologia kristian. Dòktor lo tabata asta peligroso den su wowonan. E rabia di iglesia katóliko riba Dòktor pa kua finalmente pastor Amado Römer na 2007 a pidi pordon, tin su historia. Na 1935 mgr. Verriet i Dòktor a lanta Partido Katóliko (CRKP). Sinembargo pa Dòktor, CRKP tabata ‘slow’ pa sostené derechi di voto universal i outonomia interno. Dòktor a kibra ku CRKP na 1948, pero no a entregá su asiento na partido. CRKP ta kibra i algun miembro ta lanta Partido Katóliko di Pueblo (KVP). Hopi ta brua CRKP i KVP den otro. Ta dos partido diferente. Otro miembronan di CRKP ta sigui Dòktor i lanta PNP. E odio di iglesia kontra Dòktor tabata asina profundo ku a ninga dera Dòktor den un santana katóliko.
Kua tabata e úniko partido ku mester a vota p’e segun iglesia katóliko? KVP. Pasombra e tabata e úniko komprometé na prinsipionan di Vatikano i iglesia. Resultado di elekshon tabata un sla formal pa iglesia. KVP a saka solamente un asiento i PNP a gana elekshon. E prinsipal defensor di iglesia katóliko, korant Amigoe, a papia di “een klap in ons gezicht”. DP, ku a sali na di dos lugá djis tras di PNP, a premirá e komienso di final di e era di dominio di iglesia den polítika.
Willemstad, Curaçao
