“Pobresa ta nos destino, Dios spar nos dushi tera”

0882E7B2-CD72-42CD-AE13-C6E69A945148

Frater Radulphus a komponé Den Toer Nación na 1898 ku tabata keda kantá na skolnan katóliko i tambe durante selebrashonnan di Oranjehuis. Debí na su popularidat, e a bira nos himno nashonal, ounke e no a keda ankrá den lei. Originalmente e melodia di e piesa tabata basá riba un kanshon tradishonal di Oustria, pero esaki a keda kambiá na 1938. Durante di añanan e kanshon tambe tabata konosí komo Nos Tera òf Nos Tera Ta Baranca.

Normalmente himnonan nashonal ta inspirá orguyo di un pueblo, ta deskribí bunitesa i historia i ta proyektá un vishon positivo i alentador. Den Tour Nación ta papia di un isla skondí, un pueblo ku ta akseptá pobresa komo su destino i ku ta kontentu ku un Reina generoso ta goberná nos. I finalmente ta pidi pa Dios spar nos pober pueblo. No eksaktamente letranan ku ta insipirá patriotismo i un spiritu luchadó. Despues di 80 aña, na 1978, Den Toer Nación a keda remplasá. Ta interesante determiná kuantu daño na nos konfiansa propio e kanshon aki -memorisá i internalisá for di chikí na skolnan- a hasi.

E letranan original: di 1898

1. Den toer nacion nos patria/Ta poco conocir:/Den di lamar inmenso/E ta pará scondir.

2. Ma toch nos ta stiméle/Ariba toer nación,/Su gloria nos ta canta/Di hinter nos coerazon.

3. Nos tera ta barranca/I solo ta kima./Pobreza ta nos suerte/I bida ta pisá.

4. Ma doesji ta nos bida,/Trankilo i sosegá,/Gozando di fabornan/di un pueblo respetá.

5. Ni un lei di tiranía/Ta primi nos pisá/Bandera di Hoelanda/Ta kubri nos hogar.

6. Un Reina poderosa/Wilhelmina di Nassau/Coe mano generosa,/Ta goberná Corsouw.

7. Dios spaar nos doesji tera,/Nos tera di Corsouw,/Dios spaar nos fiel bandera,/Bandera rood, wit blauw.

8. Dios spaar nos soberana,/Nos mama bienstimá,/Dios spaar nos pober pueblo,/Un pueblo fortuná.

Willemstad, Kòrsou

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

2 thoughts on ““Pobresa ta nos destino, Dios spar nos dushi tera””

  1. TREMENDO, Alex! Mi no ta korda e ‘himno’ aki, anke mi mester a kant’e den mi hubentut, sin ku – e tempu aya – mi a realisa kon denigrante e letranan aki ta! Bo sa, Alex, *a bira tempu, **NO! Ya tempu a pasa pa nos pueblo por a manifesta su propio orguyo! Pero, nos ‘mandatarionan’ nunka a pensa KON di yuda nos pueblo ‘prosesa’ e pasado di sklavitut i di inferioridat, ku te dia di AWE ta hunga un rol den hopi di nos hendenan.* *Laga mi no sigui riba e tópiko aki, pero sugeri pa bo lesa mi novela ‘Contrasten in Kleur’, kaminda e aspekto aki ta keda deskribi. * Na varios okashon mi a publika e opinion aki riba FB, ora un topiko mas o menos similar bira un interkambio riba FB. Mi ta keda te aki i mi ta spera ku gobiernu, of mas bien, ku NOS i MAS MANERA NOS, por logra konbense gobiernu ku a bira tempu pa adapta nos programa eskolar di historia p’asina nos pueblo por “prosesa e pasado aki” ku te ainda tin un impakto negativo riba nos desaroyo i orguyo propio! Mi ta tende bo reakshon. The usual best from

    Jopi

    On Thu, Aug 22, 2019 at 9:15 PM Alex David Rosaria Blog wrote:

    > alexdavidrosaria posted: ” Frater Radulphus a komponé Den Toer Nación > na 1898 ku tabata keda kantá na skolnan katóliko i tambe durante > selebrashonnan di Oranjehuis. Debí na su popularidat, e a bira nos himno > nashonal, ounke e no a keda ankrá den lei. Originalmente e melodia di e p” >

    Like

  2. Danki pa bo komentario Jopi. Ta hopi aña a hinka bergwensa den nos mes pa motibu di nos pasado, koló.. I nos mes a internalisá esaki. Tin un trabou largu pa nos hasi, Pero mester kuminsá si. Mayan na Mensing lo mi wak Contrasten in Kleur. Un abraso,
    Alex

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s