Reformulá proyekto sosten covid 19

E proyekto di reskate den kuadro di covid 19 a frakasá lokual m’a premirá for di 8 aprel 2020*. Ku mi añanan di eksperiensia ku proyektonan di ayudo di Nashonnan Uní, tabata opvio ku e proyekto tabata mal formulá, sin un sistema di ehekushon na drechi i ekstremadamente vulnerabel pa korupshon.

Fòrti no a definí koutelosamente esnan ku tin mas nesesidat pa haña sosten (“targetting”). E plan ta karesé di kriterio, “benchmark”, dato konfiabel i ademas poko komunikashon entre nos institushonnan a yuda nèk e proyekto.

E aspekto di ehekushon tambe tabata defisiente. Sierto negoshi a tende ku ounke nan no ta riba e lista nan por apliká tòg i tin empresa ku te awe no a haña kontesta riba nan petishon pa yudansa. Falta di data konfiabel a keda eksponé: e.o. empresanan ta inskribí den un sektor, mientras nan ta hasi negoshi den un otro sektor, i hendenan inskribí na adrèsnan segun Kranshi, ku no ta kuadra**. Esaki a habri porta pa korupshon, willekeur”, “vriendjespolitiek” i fondonan ku no a yega esnan mas vulnerabel. Pues no ta un sorpresa ku algun empresa a tuma plaka pa paga empleado, pero no a hasi esaki. No ta un sorpresa pasombra e proyekto mester a limitá e ròl di Fòrti na garantisá fiansanan di emergensia di banko pa empresanan den nesesidat. Fòrti no mester tabata metí den partimentu di plaka. 

Kon bin Hulanda a aprobá e proyekto aki, mi no sa. I Fòrti no a skucha esnan ku a atvertí pa e difisiensanan di e pakete di ayudo. Staten tampoko a hala atenshon na tempu di Fòrti. Lokual ta hasi doló ta ku Den Haag mester hala nos orea mientras ku nos tabata sa aki ku e proyekto lo a bira un pesadia. I na e momentu aki tin un korementu di kabes di gai pa kontestá e reklamonan Hulandes.

E preis ku nos ta paga pa un proyekto mal formulá, mal ehekutá i malversashon di fondo, ta haltu. Hustamentu un proyekto ku mester a trese alivio pa esnan ku mas a sufri di e konsekuensianan di covid 19. Kiko awor? Mester ban bèk bòrchi i formulá un proyekto na drechi ku ta “target” i definí skèrpi esnan ku mester di ayudo. Tambe mester drecha e aspekto di ekekushon i introdusí òf apliká “checks and balances” pa evitá korupshon, nepotismo i faboritismo. Loke a pasa te ainda no por kontinuá.

Willemstad, Kòrsou – alexdavidrosaria.blog

#covid19 #coronavirus #curacao

* https://alexdavidrosaria.blog/2020/04/09/curacao-needs-to-cushion-covid-19-pain-but-without-real-changes-well-be-back-to-square-one/

** https://alexdavidrosaria.blog/2018/12/06/bo-sa-ken-ta-registra-na-bo-adres/