Ta nos so por kambia nos

Poko despues di konkista di Kòrsou (1499), monarkia Spañó a yama nos isla inútil. Nevermind ku e monarkia tabata pestá ku malesa mental i ‘incest’.

Na 1816 (te 1937) Aruba, Boneiru, Saba, Statia i St. Maarten por a voto pa un tipo di gobernashon lokal, Raad van Policie. Kòrsou no a haña e mesun derechi pasombra “gobernashon di tur e seis islanan tabata na Kòrsou i presensia di dos gobernashon ta kompliká p’e Yu di Kòrsou

Di 1828-1833 Kòrsou a bira un munisipio, pero nos no por a elegí nos konsehalnan. E yu di tera lo no por komprondé e sistema munisipal, según Hulanda.

Na 1865 Sürnam a haña derechi pa parsialmente vota pa nan parlamento. Nos mester warda te 1937 pa derechi igual. E motibu: “ze zijn niet volwassen genoeg” segun minister di Kolonia.

Después ku na 1869 yu di tera Généreux de Lima a sklama pa eliminá diskriminashon kontra Kòrsou, J.J. Hamelberg a bisa ku si hende pretu i muhé vota lo bin adorashon di dios falsu, sèks entre hende i bestia i kanibalismo. Hamelberg tin un kaya den Otrobanda i de Lima ta sin rekuerdo.

Frater Radulphus ta komponé Den Toer Nación na 1898 ku a bira nos himno nashonal. Ta resaltá e siguiente frasenan.

Den toer nacion nos patria/Ta poco conocir/Den di lamar inmenso/E ta pará scondir. Ma toch nos ta stiméle. Pobreza ta nos suerte. Ma doesji ta nos bida,/Trankilo i sosegá,/Gozando di fabornan/di un pueblo respetá (esta Hulanda: Rosaria). Dios spaar nos pober pueblo.

E simiñanan di duda i humiliashon no ta un kos di pasado. “Nos no por nada”, “hende pretu no por ku poder”, “derechi igual di hende di mesun sekso ta kondusí na matrimonio entre hende i bestia”, “no tin kos pa èksportá”. Asta tin un partido aki ku komo solushon ke entregá nos na Oropa (UPG) pa haña tur benefisio (sin menshoná e debernan pisá mará na UPG).

Te ki dia ta keda bisti nos poblashon e kadena di outo-duda, humiliashon? Ki dia ta splika ku sin trabou duru, sakrifisio, konfiansa i orguyo propio nos no ta yega. Ki dia ta stòp di bai tras fantasianan manera 1,000 baka, petroli, oumento di mas ku 100% di ònderstant?

Nos ta karga mayoria responsabilidat di e situashon aki: ku nos voto, apatia, mentalidat di mendigo. Kambio mester, pero esaki no ta bin solamente via Staten i lei. Ta nos so por kambia nos.

Willemstad, Kòrsou

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

2 thoughts on “Ta nos so por kambia nos”

  1. E ta berdat, ku ta nos so por kambia nos ? No, sin un lider ku un vishon i plan di mas aña, esei lo no pasa. E lider mester por dirihi i guia nos tur pa logra esei. Tambe nos mester por adapta nos leinan i reglanan segun e tempu ku ta kambia konstantemente. No ta asina ta kambia kosnan sin pia i sin kabes. Nos tin sufisiente hende kapasitá ku por, pa nos logra e metanan. Tambe nos tur mester kumpli ku e debernan i no solamente wak nan derechinan so. Ta nos tur su tarea i no otronan.

    Like

    1. Tony, mester tin un lider na kabes. Tin pais eksitoso tin lidernan seremonial na kabes. Hecho si ta ku riba turrr nivel nos mester di lider. Di ariba te den nos bario i kas nos mester di bon liderasgo.

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s