For di 1945 nos a pidi pa no pone nos riba lista di dekolonisashon

Foto (UN): Alexander Loudon ta firma e Karta di UN na nòmber di Reino Hulandes. Su tras, di dos na man robes, John Horris Sprockel.

Vários ta riba e trein pa denunsiá Hulanda di a faya ku e proseso di dekolonisashon di Nashonnan Uní (UN). Por tuma nota di un seri di (mal)informashon di e eventonan na 1955 ku a kondusí ku awe nos no ta riba e famoso lista ku tur ta papia di dje, lista di paisnan ku mester dekolonisá.

Mayoria no ta konsiente ku for di 1945 nos pais a deklará di no ta un kolonia i nunka a subi e lista original di paisnan ku mester dekolonisá. Ta bon pa tuma nota ku pa kambia di status polítiko (uso di outodeterminashon) bo no mester ta riba un lista. Na 2011 South Sudan a bira independiente. Na 1975 e Reinado di Sikkim a disidí ku e no ke ta independiente mas i a integrá den India. Ningun lista a stroba nan. Ta bon pa esnan ku ta skòp Hulanda sa ku si bo ke bira independiente òf provinsia, djis kombensé un mayoria di pueblo via di un referèndum.

Ban pa 1945. Durante di e konferensia na San Fransisco pa lanta UN, a diskutí status di paisnan sin gobernashon propio. Nos pais tabata representá pa Sr. John Horris Sprockel, Presidente di Staten pa Curaçaosche Roomsch Katholieke Partij (CRKP). Normalmente ta lider di CRKP, mr. dr. da Costa Gomez (Dòktor) tabata bai konferensianan internashonal, pero pa rasonnan polítiko e no a bai. Na momentu di e konferensia ku por sierto a dura 2 luna, Dòktor tabata okupá ku Partido Demokrat ku a kaba di lanta na desèmber 1944 i tabata mustra di lo a bari den elekshon pa Staten na 1945.

Na San Francisco Sr. Sprockel ta keda nombrá den e poderoso supkomishon responsabel pa diseñá e International Trusteeship ku e meta:”[to] promote the political, economic and social advancement of the non-self-governing territories and their development towards self-government and self-determination.” E paso aki tabata esensial pasombra a kaba di kita tur kolonia di e paisnan ku a pèrdè di Dos Guera Mundial i a pone nan bou di responsabilidat di komunidat internashonal.

Na momentu ku algun delegado di otro paisnan a puntra nos pa keda inkluí, i asta a bisa di ta dispuesto pa kambia/amplia e diseño di e International Trusteeship pa inkluí Antia Hulandes, Sr. Sprockel a bisa ku esaki no mester: “The Kingdom of The Netherlands is far more ahead regarding decolonization than what was the initial goals of the UN Trusteeship”.

Dòktor despues den vários reunion di Staten ta deklará ku outonomia ta na kaminda i ku no tabatin sentido pa keda inkluí riba lista di UN. Nos pais ta haña gobernashon propio na 1951.

Willemstad, Kòrsou

“Curaçao’s Belang bij San Francisco” 28 yüli 1945; Notulen Staten van Curaçao 1945-1946

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s