Religion ta bèk den polítika

E lucha pa (mantenshon di) poder di iglesia katóliko na Kòrsou ta palpabel. Por ehèmpel kon hefe di Korte na Willemstad, dr. Charles de la Try Ellis (1881-1977), un yu di tera i prominente katóliko ligá ku e tòp di iglesia, ta laga èkspulsá un religioso pasombra e a defendé shofùrnan di taksi. Katólikonan tabata dominá sindikalismo (Don Bosco i Sceom) i no tabata tolerá desviashon di regla di iglesia. (1)

Den polítika iglesia semper a kampañá kontra “mal katólikonan” (2,3). Si nos kere ku e ambishon pa poder i influensia riba polítika ta algu di pasado, nos ta ekiboká. Por lo ménos 3 partido den nan evaluashon (preliminar) di kampaña tras di lomba a konkluí ku iglesianan kristian a influensiá e diskurso polítiko i resultado elektoral ku nan ponensia riba derechi igual di LGBTQ. Abiertamente algun iglesia poderoso na plaka a bisa nan miembronan pa no vota pa partidonan ku ta pro-LGBTQ. Nos ta mira tambe ku e dos partidonan ku ta igualito den nan oposishon pa LGBTQ tabata eksitoso na urnanan i awe ta huntu den Fòrti.

Por a premirá esaki for di momentu ku pastornan kristian huntu ku Obispu a subi tarima na Alameda i a skupi venenu i sembra teror kontra LGBTQ (4). Mi ta premirá ku nan lo sigi influensiá politika ku nan enorme kapital. Den mundu, pero prinsipalmente na Merka gruponan kristian di teror a oumentá nan retórika kontra di toleransia i repudio pa esnan diferente na nan.

Religion ta bèk den polítika. Kiko awor? Kisas nos ta leu pa igualá Merka. Lokual si ta e kaso ta ku a influensiá polítika ku retórika di odio. E pensamentu di divishon: ami ta “bon” i otronan ta “malu”. Ta di spera ku Konseho Elektoral den su rapòrt lo tin mas ku bunita potrèt i elogio propio manera kustumber, kon bon elekshon a kana riba 19 di mart 2021. Mester di atenshon profundo tambe pa e (nivel di) influensia di iglesia riba elekshon. Lo ta bon papia ku e partidonan ku a konstatá esaki i hasi un evaluashon. Final di kuenta pa un demokrasia funshoná manera debe ser no por tolerá e tipo di manipulashon aki, ku laga nos ta sinsero, ya a sosodé den pasado.

Willemstad, Kòrsou

(1) The Role of the Roman Catholic Church in the Social Development of Curaçao since the Abolition of Slavery, Cornelis Streefkerk

(2) https://alexdavidrosaria.blog/2019/06/04/kon-iglesia-a-kaba-ku-kvp-pasombra-esaki-a-traha-ku-dp/

(3) https://alexdavidrosaria.blog/2017/11/20/a-ninga-dera-doktor-den-santana-katoliko/

(4) https://alexdavidrosaria.blog/2019/07/13/iglesianan-a-uni-pa-antagonisa-i-sembra-odio/

Author: alexdavidrosaria

Alex Rosaria is from Curaçao. He has a MBA from University of Iowa. He was Member of Parliament, Minister of Economic Affairs, State Secretary of Finance and United Nations Development Programme Officer in Africa and Central America. He is an independent consultant active in Asia and the Pacific.

6 thoughts on “Religion ta bèk den polítika”

  1. Danki pa e literaturanan. Tur hende mester kompronde ku influensha politika tin di haber ku hopi otro aspektonan di komunidat. Pobresa, kriminalidat, enseñansa, politika estatal, hustisia soshal, pobresa et cetera. Si ta manera bo ta bisa anto iglesianan lo hañanan konfronta ku hopi di e aspektonan menshona. Ban wak ki ta nan posishon entorno esakinan

    Like

    1. Historia ta mustra ku semper Iglesia tabata hambrá pa poder i a hiba luchanan sangruiente pa yega einan. Pobresa i hustisia no tabatin haber ku esaki. Na Kòrsou durante añanan Katólikonan a hiba un lucha pa poder i no a skondi nan set pa revancha. Bo ta kere ku ningando pa dera Dòktor den un santana katóliko òf èksihí di Katholieke Volkspartij pa kita ‘Katholieke’ for di e nòmber di KVP* pasombra esaki a traha ku DP ku Obispado tabata konsiderá enemigu tin ke ber ku hustisia soshal? Pakiko bo ta kere ku na 2007 Pastor Römer a pidi pordon pa e manera ku iglesia a trata Dòktor? Bo ta kere ku persiguí miembronan di LGBTQ i kore kampaña pa partidonan anti-LGBTQ (MFK i PNP) tin ke ber ku pobresa?
      *Bou di menasa di Obispado a kambia e nòmber den Konstruktieve Volkspartij

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s